البيضة والحجر

الاسبوع الى قبل العيد كان حافل بالاحداث والمناوشات والغضب والحيرة و سوء التفاهم,  الاسبوع الى قبل العيد حط لي حاجات كتيرعلى المحك , الاسبوع الى قبل العيد بلور لى حاجات كتير كانت بتلف يمين وشمال و مش عارفه اقفشها و احددها واخد موقف منها .. 

  1. كل بنى ادم في اي مجموعة من الناس عايش لنفسه بيتكلم لنفسه بيدور على مصلحته وبس  
  2. البنى ادم غبي وبيبص تحت رجليه مش بيبص لقدام عايش بمبدا احيني النهاردة و موتني بكرة  يعنى اما يبقى في حد بيتكلم في حق عام و مبدا الحفاظ عليه بيحقق مصلحة عامة و مستمرة لمجموعة من الناس هو واحد منها مافيش ما يمنع ان حد من نفس المجموعة يزيط في الزيطة و يدخل بكتفه و كوعه في الكلام عشان يحقق لنفسه مصلحة وقتيه شخصية حتى لو كان ده معناه ان الطريق لتحقيق المصلحة العامة المستمرة هايتقفل بالضبة والمفتاح 
  3. عشان تنجح و تتقدم في شغلك لازم يكون ولائك لنفسك وبس نفسك وبس كمان مرة نفسك و بس فكرة ان يكون ولائك لشغلك غلط لانك لما بتدي شغلك كل الى تقدر عليه وزيادة شويه مش بيديك غير مرتبك و بيمن عليك بيه كمان , ما تثقش اوي في المديربتاعك مهما بدا لك انه كائن كويس المدير في الغالب ما وصلش لانه يبقى مدير غير عشان لائه لنفسه و عشان وقت اللزوم خلى بالى وثقوا فيه عشان يحافظ على مركزه او يفتح طريق يوصله لمركز اعلى ولائك للزمايلك  وثقتك فيهم شيء يضحك لان وقوفهم وراك مرتبط بقد ايه ده بيحقق لهم مصلحتهم الشخصية الوقتيه الحالية كمان كونهم وراك معناه ان ساعة الجد انت الى هاتشيل التلطيش كله و تديهم فرصه يهربوا يستخبوا
  4. مش بس الناس الوحشه الى ماشية كده الناس الكويسه كمان ماشية كده مش عشان بيمثلوا انهم كويسين لا بس عشان اتعلموا قبلي ان مافيش فايدة وان اللا لا لاند لا وجود لها انا بس الى ادراكي لكل ده جه متأخر شوية 
و بناء عليه انا في شوية قرارات مصيرية لازم امشي عليها زي الالف 
  1. يخرب بيت الى يزعلنى , يخرب بيت الى يزعلنى , كمان مرة  يخرب بيت الى يزعلني ... لان صحتى النفسيه و العقلية و البدنيه ابدى واهم انا لو اتجننت ولا رقدت عيانة مين هاينفعني ؟ الشغل هايقطع المرتب و المدير والزملا سواء بنى ادمين كويسين ولا وحشين مش هافرق معاهم كتير  المثل بيقول البعيد عن العين بعيد عن القلب اخرك تتحول لمادة نميمة و صعبنة و مصمصة شفايف  شويه لحد ما ينزل لهم "اب ديت" جديد بموضوع نميمه جديد 
  2. لازم احافظ على انسانيتى حتى لو كان التمن انى اخد فلوس اقل مهما كنت محتاجة الفلوس دي ما ينفعش اسيب روحي اتحول لثور مربوط في ساقية عشان قرشين زيادة مايساوش الى اتعمل عشانهم 
  3. لازم اجري ورا احلامى بمجهود اكتر من كده و لازم افضل احلم و اناضل عشان حلمي عشان كلام الاغاني بتاع لو بطلنا نحلم نموت مش كلام اغاني و خلاص ده حقيقي الموت مش موت العادي لا ده موت انسانيتك و احنا قلنا لازم نحافظ على انسانيتنا
  4. عشان تحافظ على انسانيتك لازم تخبيها و عشان تحافظ على احلامك بردو خبيها كل الى احلامهم وانسانيتهم ماتت سواء حد قتلها جواهم او قتلوها بإديهم عشان يبطلوا يتوجعوا هايحاولوا يعملوا فيك الى اتعمل فيهم او الى عملوه في نفسهم بإديهم سواء عشان متغاظين منك و عايزين الروس تتساوي او عشان بيحبوك وخايفين عليك وشايفين ان في ده مصلحتك 
حافظ على نفسك حافظ على انسانيتك حافظ على اللالا لاند الى جواك بس اوعى تعيش نفسك جواها


0 التعليقات:

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..