العاكس والمعكوس

لما بتبص لنفسك في المرايه بتشوف ايه؟ بنى ادام ولا جني ولا طيف شفاف بلا لون او اوزن ؟ ولما بتبص في الصور الى اتلقطت لك في فرح فلان او شبكة ترتان وانت واقف بتضحك للحياه والكاميرا وعينك على البوفيه الى بيترص الناحيه التانيه . هل شكلك بيختلف عن البنى ادم الى شوفته فى المرايه وانت بتربط الكرافته او بتلفى الطرحه قدام المرايه قبل ما تنزل وتروح على الفرح ولا الشبكة ؟؟

هل صورك بتاعة الرحلات مع اصحابك والشلة او مع العيله يوم العيد شكلك فيها بيفرق عن البنى ادم الى ملحقتش تشوفه وانت نازل متسربع عشان هاتتاخر على اتوبيس الرحله او على افطار العيد المتين عند تيتا.
هل صورك في الفرح والشبكه بتفرق عن صورك في العيد والرحله سيبك من لابس ايه والمصور محترف ولا لا. هل انت بتفضل انت ؟ ما سئلش نفسك مره مين ده؟ كان بيعمل ايه؟ ولا فاشخ ضبه بأمارة ايه ؟!!


هل عنيك هى هى؟ البنى ادم الى باصص من شباكها هو هو ؟؟ طب هل هى نفس النظره الى كنت متصور انك بتبصها ؟




العنين ما بتكذبش .. اهى دى بقى اكذب مقوله في التاريخ بأمارة جوايز الاوسكار والايمى والسعفه الذهبيه الى بتوزع يمين وشمال كل سنه. بالتدريب وبالموهبة ومش لازم تعمل افلام وتخش الاوسكار او تروح كان كفايه اوى الافلام الى هاتنتجها وتخرجها وتقوم ببطولتها في البيت والشارع والشغل والمواصلات وعند البقال .

بس للحق العنين عبيطه وبينضحك عليها هاتقولها انا قليل الادب هاتقول انا قليل الادب هاتوقلها انا كتوموتو هاتقول انا كتوموتو هاتقولها انا الريس متقال هاتغني الفراوله بتاع الفراوله





انا مين؟ وانت مين؟ والناس الى بتطلع صورها في صفحة هواة المراسله مين؟ والولد الى مستخبى ورا صوره جوي تريبيانى بتاع فريندس في المنتدى مين؟ والبنت الى لابسه صورة ساندى بيل في برنامج الشات برده مين؟ اختارو الصور دى ليه؟ هل مثلا شايفين نفسهم في الصور دى "انا شبه فلان او علانه " و اذا اخترعوا في يوم كاميرا تصور روح البنى ادم هتلاقى ان روحه شبه جوي تريبيانى او روحها نسخه من ساندي بيل .

ولا هما بيحاولو يضحكو على نفسهم وبدل ما يبصوا في المرايه ولا في صور الافراح والرحلات بيبصوا في صور الناس التانيه و يبتسموا هما راضين عن نفسهم والدنيا .طيب والى بيحطو صور حيوانات او مناظر طبيعيه او حتى تداخلات سرياليه غير مفهومه بيحطوها كده والسلام ولا هما شايفين نفسهم كائنات تانيه ترتدى زيا ادميا لبعض الوقت وهايجى وقت تقلعه وترجعه للمكوجى الى استلفته منه وتروح تلبس لها زى تانى من عند مكوجي تاني في مجرة تانية

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..