كيف بدت الغابة

لم افهم يوما الحاجه الملحه التى تجعلنا نجتمع كل فتره فى بيت احدانا لنلعب و نثرثر .مازال ثعبان المتاهه الطويل على حلفه مع النرد يرفعن النرد بارقام عاليه متتاليه لا احتاج معها لتسلق اى سلالم حتى اصل الى فك الثعببان المنتظر قبل النهايه بخطوتين لاعود الى اول المتاهه من جديد لا ينقذنى منهما الا فوز احدى البنات بينما تنتهى مونوبلى دائما بانسحابهن كل تلقى اوراقها وتقول مش لاعبه .. يكون هذا بعد ان تثقلهم الديون ويضطررن لاقراض بعضهن وعقد احلاف لمواجهة تكاليف البيوت والفنادق و محطات الماء والكهرباء ومواقف السيارات التى امتلكها.

ليدو ثانى اكثر لعبة شعبيه هنا, اشارك فيها من قبيل عدم الخروج على الجماعة لم افهم يوما نظريه اللعبه تاثير مجموع النرد او توافق أوجهه فى مسار اللعبة وحركة القطع رغم ذلك اجدنى احيانا كثيرة فائزه مقررةً عقوبه الخاسر ربما لانى فى الحقيقه لست العب وانما يلعب لى الجميع. سكرابل هى اقلها شعبيه دائما ما تقطعها والدة الصديقه التى نجتمع فى بيتها نترك اللوحه والاوراق وحين نعود من الغذاء تزيح احداهن اللوحة رغم اعتراضي لتضع لوحة المخاطرة وهى لعبة اخري لا افهمها لكنهن لا يلعبنها لى كليدو فقط يصححن اخطائى التى تضرهن في أقل من نصف ساعة افقد قواتى و بلداني فتعتقلنى المنتصرة فى احد بلادها تمهيدا لمحاكمتى على جرائم الحرب التى ارتكبتها..


في تلك المرة حين عدنا من الغذاء اقترحت احدانا ان نلعب لعبة مختلفه شيء لم نفعله من قبل ماذا عن لعبه القوائم القديمه ورقه من منتصف كشكول تثنى كانها مروحه ثم تملاء كل طبقه بموضوع اسمه ,سنه ,كيف ستقابليه, مهنته, عدد الاولاد. تذمرنا "دى هاتاخد وقت طويل اوى" .. "عايزه تهربى من المعتقل"..."لا عايزه تعرف هو مين" .."هأهأهأهأ" ..."انا بضرب مثل ممكن نغير المواضيع او نلعب اكس او" .." يا سلام" .... "استنوا اخويا علمنى لعبه جديده". امرتنا ان نجلس فى حلقه وان نغمض اعيننا ثم نتخيل انفسنا نمشي فى غابه حتى تقابلنا صخره تسد الطريق علينا ان نفكر كيف نجتاز الصخره لنواصل المشي حتى نصل الى نهر الان علينا ان نعبر النهر لان البيت فى الناحيه الاخري ... "خلاص فتحو عنيكوا " تعلقت اعيننا بها فى انتظار ما تقول لكنها ظلت تحدق بنا ثم انفجرت ضاحكة " ما اعرفش اخويا ما رضيش يقولي" . فكرت جديا فى قتلها لكنها افلتت من كفى ومن حجرالنرد الذي قذفتها به صديقتي.


في طريق عودتنا سألت صديقنتى عما رات "غابة تشبه غابة روبين هود وحجر ضخم طوله كاخي الصغير تسلقته سريعا.اما النهر فكان بلوغه سهلا لان هدير الشلال كان عاليا لكنى اضطررت للسباحه فلم تكن هناك قوارب ولا اعرف كيف اصنع واحدا.. "لكنك لا تجيدين السباحة" .."كنت اجيدها فى الخيال" .." ولماذا لم تجيدى صنع القوارب فى الخيال" ضحكت "ما اعرفش" . سالت " والبيت" .. " كان يشبه تلك الاكواخ التى يتصاعد منها الدخان اثناء العواصف الجليديه.. وانت " .. "كانت غابة استوائيه شبه مظلمة بسبب تشابك الاغصان الصخره كانت اطول منى مرتين لكنها كانت منحدرة قليلا فاستطعت تسلقها قفزت للناحيه الاخرى لكن السقطه اوجعتنى .. النهر كان ضحلا موحلا يبدوا ان موسم الفيضان لم يحن بعد و كان مليئا بقطع خشب طافيه " .."اضررت لخوضه مشيا؟" ..." حاولت لكن قطع الخشب الطافيه كانت فى الحقيقه تماسيح لم اشاء المخاطره فاستعنت بعود بامبو طويل وقفزت للناحيه الاخري كما يفعلون فى العاب القوى" ..ضحكت " والبيت " .." لم يكن هناك واحدا .. اضررت لبناء واحد فوق الشجر كطرزان".....


حين بلغنا بيتها سألتنى وانا اودعها "تفتكري غابتها كان شكلها ايه" .. ضحكت فى خبث " ما اعرفش بس اكيد ما عرفتش تعدى الصخره و رجعت مطرح ما جت"

9 التعليقات:

kalam 10/5/06 9:48 ص  

ههههههه
مش عارف انتى بتعذبى نفسك ليه
يعنى خليتيها غابه استوائيه والصخره كبيره ولازم تتشعبطى عليها
وكمان النهر ضحل ومليان تماسيح
حتى البيت انتى اللى بنتيه
انا شخصيا هامنجه نفسى
هاعدى فى جنينه فواكه مش غابه
والصخره هتبقى حلوه صغيره كده وهاقعد اريح عليها شويه
والنهر هيبقى فيه قارب مستنينى وفيه جارسون هيقدملى واحد موز باللبن على ما نوصل الجهه التانيه
اما البيت
فهيكون فندق ماركه هيلتون
عشان الخدمه تبقى كويسه
مهو مش معقول بعد التعب ده لسه هاخدم نفسى

على فكره انا كمان حريف مونوبولى
اصحابى كانوا بقولولى انت اصلك تاجر يهودى
عشان كده دايما بتكسب

bosbos 10/5/06 11:46 ص  

انا عارفه اللعبه دي

واحده لعبتهالي ايام الكليه بس مش فاكره مين
متهيالي بعد البيت كان في واحد مستني كمان

زبادي 10/5/06 4:04 م  

أنا عجبتني الغابة بتاعة أخويا كلام.. نشرب موز باللبن مع بعض وبالليل في الهيلتون حياة سهلة وجميلة
أنا هربت من الغابة الإستوائية لسبب بسيط تخيلت نفسي قاعد فيها بالليل وقال أية لازم أعدي الصخرة والحاجات التانية كلها .. لا ياستي مش لاعب معاكو تاني

نعناعة 10/5/06 7:18 م  

هههههه
على ما اذكر المفروض ان تمشى مع اول صوره تظهر فى ذهنك اول ما يقولك انت ماشى فى غابه فاول صوره للغابه تبقى هى الصوره دى انا مش فاكره ليه بس تقريبا كل واحده فيهم ليها دلاله ما ... مع ذلك تمنياتى لكما باقامه مريحه فى الهيلتون وميلك شيك موز لذيذ

نعناعة 10/5/06 7:21 م  

انا برده فاكره حاجه زى كده يا بسبس بس مش فاكره كان بعد البيت ولا جواه ... غالبا جواه بيطبخ ويمسح مستنى عظمه جلاله المغامره بالميه والملح
هؤهؤهؤهؤهؤ

LAIMONA 2/6/06 1:52 م  

سلامي للججيع و خاصه لنعناعه التي تملك موهبه لا غبارعليها و الذي قرات واحد من موضعاتها جعلني اعود لقرات كل المواضيع السابقه و و اعجابي وصل لدرجه جعلني انا الملوله بطبعي اشترك في الموقع و اخترع مئات الاسماء اللي رفض متفضلا قبولها دون سبب واضح لمجرد ان هو يغظني و كل ده علشان اقول لك برافو عليكي بالمناسبه انتم حطيتوا الصور دي ازاي انا قلت ان هو مطهضني حتي ما سالنيش ان كنت عايزه احط صوره صحيح انا معنديش صوره بس انا بتكلم علي المبدا علي كل انا عجبتني اوي ذكريات المدرسه وموضوع اعلانات الشيبسي و سمحيني ان كنت مش بحفظ اسماء المواضيع لكن للحق وراي المتواضع و الذي لس له اي خلفيه تقافيه انك موهوبه والمواضيع كلها في المجمل حلوهو شكرا

نعناعة 3/6/06 5:06 م  

اهلا ليمونه
شكرا جزيلا على الكلام الجامد اوى فى حقى ده .. ربنا يكرمك يا بنتى ولا يسيبك تتعصري ابدا

الصوره بتحطيها من وصلة
edit profile
الى بتبقى على جنب فى الصفحة الى بتحمل اول ما بتسجلى دخول

نعناعة 3/6/06 5:07 م  

الا صحيح .. احنا نعرف بعض قبل كده ؟؟ اصل عندى احساس شرير انى اعرفك
:)

LAIMONA 4/6/06 5:22 م  

احساس شرير انك تعرفيني يمكن اكون شفتك في كوبايه شاي مجاوره لكبيتي انا مش عرفه بجيب خفه الدم ده منين بس اظهار عيب خلقي المهم رغم اني مش عرفه احساسك ده جالك منين الا انه ممكن نكون اتقابلنا و انا مش عرفه معرفش بس الاكيد ان انا مبسوطه اني قابلتك

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..