المية جت بدري المية جت بدري يا اهلا بالسيد المسئول

المكان : بينتا العامر
الزمان : العاشرة و خمسون دقيقة مساء
الحدث : الله ما هو باين من العنوان .... المية جت بدري

هاتقولى هى المية بقطع عندكوا هاقولك امال انا عاملة فرح ليه ....

الموضوع تعود جذورة الى اربع سنين خلت حين اصبحت المية تقطع بانتظام من 12 ظهرا الى 8 مساء وكان الرد على الشكاوى المستمرة من الموضوع ان في اصلاحات وحفر عند الرئيسي وعشان كده ما فيش ميه وادارة المية تهيب بالسادة المواطنين تحويش ما يكفيهم من مية لتمر بهم هاذوها ال8 ساعات بالطول ولا بالعرض لكن الاصلاحات والحفر اتضح انها عملية انشاء نفق مصرف اللبينى الي بقى اسمة بعد التنضيف وردم المصرف والذي منه الشيخ الشعراوي والى الغرض منه وفقا للعالمين ببواطن الأمور انه يخفف من حدة الاختناق المروري عند تقاطع ترعة المريوطية مع شارع الهرم ثم تقاطعها مجددا مع شارع فيصل والذي كان يساهم فيه بشكل بناء ميكروباصات الكرداسه والمنشية التى لا تتوقف عن تحميل وتفريغ المواطنين عند هاذين التقاطعين دعك طبعا من الطريق الدائري الذي صار له منزل ومطلع على الجانبين

النفق اخذ في وشه سنتين وخلص والحفر اتردم وصارت ميكروباصات الكرداسه و المنشيه تتسابق فيه وتضرب كلاكسات وظلت ساعات وجود المية تقل وتقل حتى وصلت من كام شهر ساعتين بالعافية في اليوم فصار موضوع المناظرات بين الناس هو جودة المواتير و صغر قطر الواسير أوضعف تيار المية في هذه المواسير وكانت تقارير السادة المراقبين تفيد بان البرج الجديد الى على اول الشارع المواتير فيه بتدور من الساعة 7 مساء وان العمارة الى في الوش موتورهم بيشتغل من الساعة 2 بالليل بينما العمار ة الى جنبنا لزق بتجيهم المية الساعة 3 وتقطع 7 لكن من وقت للتاني لما اقابل صاحبتى الى ساكنه في العمارة الى جنب جنب جنب الى في وشنا ولا اختى تسلم على صاحبتها الي فى العماره الى قبلنا بعمارتين ونسال او نتسال عن الميه كان بيتضح ان كلنا في الهوا سوا وان فلانه عرفت من علانه الي عرفت من أخوها الكبير ان البرج الجديد الى على اول الشارع عندهم طرنبة مية في المنور وان المتور لما بيشتغل بدري بيسحب منها ده غير انهم اصلا عندهم مية طول اليوم عشان مركبين خزان فوق (شوف ازاي خزان من فوق وطرنبة من تحت)

وعلى كل احقاقا للحق وانصافا للمظلوم تيار الميه داخل المواسير تمت تبرئته سريعا من تهمة الضعف داخل المواسير مع توجية اتهام اكثر خطورة هو الاندفاع القاتل في وش او فوق راس المواطنين جاعلا من فتح الحنفيه في ساعتين الميه خطر لا يستهان به ويستلزم شروطا معينة فى فاتح الحنفية اهمها على الاطلاق ان يعامل الحنفية برقة وحنان ولا يفتحها كاى اهبل اخر ولكن يلمسها فقط بس لمس عشان تفتح حته صغيرة على جنب تمثل كفاية الكفايه لملو كل ما يمكن ملوه من زجاجات وجرادل وترامس وكلامن (جمع كولمن) مع التصريح بفتح الحنفية على اخرها فقط فى حلات الطواري المتمثلة فى ملو جميع البانيوهات من اجل تزويد الغسالة او لتوفير ذخيرة حية للشغالة عشان التنفيض وخلافة

هنا بقي ياتي دور التلفزيون في توعية المواطنين فبعد ان استقر في انفس المواطنين انهم هم الوحيدين المنكوبين بهذه المسألة و صار الدعاء على السيد مسئول اول الحنفية امرا مألوفا اتضح ان السيد مسؤول الحنفية بتاعنا راجل سكرة وامير و يتحط على الجرح يبرد ففي مناطق تانية مسئول اول الحنفية لا يفتح الحنفية الا كل كام يوم بينما مسئول اول حنفية تانية قافلها من كام شهر والناس بتضطر تشتري المية وغالبا يتم ذلك من خلال عملاء سريين تابعين لسيادته وبالتالى صارت المناظرات و المداولات حول سر اتفاق السادة مسؤلى الحنفيات على المواطنين وهل هى خطة سرية من ثلاث مراحل ونص هدفها تعليم الناس بالعافية ترشيد استهلاك المية بعد ان ماتت الست سنيه السنه الى فاتت دون ان تقلع عن عادتها الهباب في ترك الحنفيه تخر او بعد ان فشل الاعلان الذي يقتلون فيه السمكة الغلبانة بتصفية الميه من حواليها في استدرار عطف او خوف المشاهدين من عواقب الاسراف ام ان السر في غلق حنفيات البر هو توفير الموارد اللازمة لفتح حنفية جديدة في مشروع قومي جديد لم يعلن عنه بعد دعك طبعا من ما تدعيه قلة مندسة لا يلتفت اليها (لانها قليلة الربايه عديمة الوطنيه سيتضح في حال القبض عليها انها مختلة عقليا) من أن الحكومة بتبيع المية لاسرائيل وان الثمن بيتحولها بالعملة الصعبة على بنك تشيز كيك بروكلين كل ذلك بينما يحاول البعض التحري عن اسم مقاول البنية التحتية للبلاد لمعرفة ان كان سباكا قراريا ام حلواني مالوش غير في حلاوة المولد و ملبس السبوع

رغم كل ما فات فانه لا يسعني إلا ان أعلن عن جزيل شكري و عميق امتناني و بالغ سعادتي بان المية النهاردة جت من الساعة حداشر الا عشرة بدل اربعه الفجر كما اتمني من السيد مسؤول اول حنفية منطقتنا الا يعاقب اهلى وجيراني على كونى اذهب كل خمس دقايق لافتح الحنفية لاناكد من ان المية لسه موجوده .

ولا يفوتنى في هذه المناسبة الميونه أن أهنيء سيادته على انتقاله وعائلته الكريمة للعيش في شارعنا الميمون متمنين لسيادته حياة سعيدة و مياه وفيرة في حنفية بيتهم الهانيء

أثنى عشر قالبا اعلانيا

بالصدفة البحته وجدت هذا الموضوع يتكلم عن اثنى عشر قالبا رئيسيا يصب المعلن في احدها او بعضها اعلانه

الديمو أو عرض للمنتج وامكانيته

إظهار الحاجة او المشكلة ... يعرض حياة المستهلك بدون المنتج ويبين له مكان النقص الذي يسده المنتج

التشخيص الجرافيكي المبالغ فيه .... يظهر المستهلك كشخص وحيد يعانى من هذه الحاجة التى يلبيها المنتج وكل من حولة يلاحظون ذلك في شكله (باستخدام برامج الجرافيك لتغير شكل بطل الاعلان او تركيب اشياء غير حقيقية عليه) ثم ياتى المنتج ليعيد المستهلك للصورة العادية لباقي البشر

المقارنة ....إظهار تفوق المنتج المعلن عنه عن باقي المنتجات الأخرى التى تقوم بنفس المهمة

القصة التمثيلية (تقدم مثالا) .... يقدم قصة تكون خلاصتها ... يحكى ان بعض الناس كانو يفعلون كذا وكذا لكن في يوم حدث كذا وكذا ولانهم يستعملون هذا المنتج فلم يصبهم أي سوء وكانو سعداء ومبسوطين . النهاية

قصة المنافع المرجوة ... يقدم قصة بطرقة فلاش باك حيث ترى امور غير منطقية تحدث وتجلب المنفعة او السعادة على بطل الاعلان او حسد المشاهد ثم تكتشف في النهاية ان بطل الاعلان استعمل المنتج ده امبارح او النهاردة الصبح عشان ده الحاجات دى عمالة تحصل ... زي اعلانات اركس .. الولد عندة حدبة غريبة الولد داخل للدكتور الحدبة طلعت بنت .. الولد بيستعمل اركس

الشهادة ... فية يقدم لك شخص يلمك مباشرة و يخبرك انه كان لا يستطيع ان يفعل كذا وكذا لكن بفضل كذا فان حياته تغيرت والدنيا بمبي وطبعا الشكل الكلاسيكى لده هو الراجل ابو بالطو بيض الى بيخرج من المعمل عشان يقولك المنتج ده ممتاز واحنا مختبرينه كويس ومش عارفة اية

شخصية المنتج .... وفية يبتكر المعلن شخصية تكون هى الممثل الرسمي للمنتج او المتحدث الرسمى له زى دب كيمو او ارنب إينرجيزر او التعلب بتاع مسحوق الغسيل الغرض من الاسلوب ده هو تذكيرك بالاعلان من خلال ربطة بشيء يسهل تذكرة

الجرافيك المبالغ فيه لإظهار المنفعة .... يستخدم الجرافيك للمبالغة في الظواهر المحيطة ببطل الاعلان ليظهر المنفعة التي تعود عليه من استعمال المنتج (يختلف هنا عن الجرافيك الاول في ان المنفعة هنا حقيقية وغير مبالغ فيها المبالغ فيه هو الظواهر المحيطة التي تجعل بطل الاعلان يثق في المنتج)

ربط المشاهد ببطل الاعلان ... وذلك بان يختار شخصا يتمنى المشاهد ان يكونه او يمكن للمشاهد ان يضع نفسه مكانة بسهولة زى اعلانات طعمة ميلك الى بتجيب رياضي بياكل الجبنة ويقوم يحقق انجازات او اعلانات نايكى الى بتجيبلك رياضين مشاهير لابسة نايكى وكمان ناس تانية عادية برده لابسه نايكى انت ممكن تتمنى تبقى زى الرياضي وفي نفس الوقت عارف انك واحد عادى كده ولا كده انت محتاج نايكى ... الاعلان الى في الموضوع نايكى :)

الخاصية الفريدة ... بيركز الاعلان ده على خاصية معينة تميز المنتج ممكن بلد تصنيعه لما يقولك الدقة اليابانيه او القوة الالمانيه او الاناقة الفرنسيه او ممكن ماركة المنتج المعروفة وهو بيقولك انها مادامت الماركة دى تبقى مضمونه او الشخص الى اخترع المنتج زى اعلان كارير وعمو كارير منقذ البشرية من حرارة الصيف وهكذا

المحاكاة الساخرة ... و فية يحاكى الاعلان بشكل ساخر فيلم او مسلسل او برنامج او حتى اعلان اخر للوصول الى هدف الاعلان

الموضوع ممكن تلاقيه هنا أما لو عايز تشوف فيديو توضيحي لكل الى فات اضغط هنا

كلمني عل البوتاجاز

في الجزء الثانى من إعلان ياسمين عبد العزيز بتاع الوهات يطاردها هذه المره رجلين ضخمين بدلا من واحد و كما فى المره الأعلان السايق يرغب فى تقطيعها حتت لكنها تظل تهرب منه وتعيش وتتكلم بالعند فيه أكثر وأكثر

هل لاحظت أن المنديل في جيب جاكيت كل من الرجلين المتطابقين مختلف ؟ واحد أحمر زي فودافون والتانى اخضر زى إتصالات ؟ أكيد أخدت بالك

الأعلان بطولة ياسمين عبد العزيز واتنين ماحدش يعرفهم اتنين لم تفعلا اى شيء تقريبا طوال الاعلان ثم يقفل عليهما قادمتان من خلف السياره التى ما تلبث أن تنفجر

ياسمين في هذا الجزء لا تثمل عميل موبينيل الذي ترغب الشركة المنافسه في الحصول علية بأى طريقه । هذه المره ياسمين هى الشركة نفسها التى تجري ورائها الان بدل الشركة الواحده اثنان محاولة أخذ عملائها و تحويل ملتهم التليفونية خاصة مع خدمة ال 3 جي في واحدة وال 3 جي ونص في التانية

اما الاتنين الى ماحدش يعرفهم فهم رمز أخر للشركتين المنافستين واحدة شقراء أجنبية الملامح والثانيه سمراء من عندنا و الانتين المرفوض انهم يساعدو ياسمين في حربها المستميته من اجل الكلام في المحمول لكنهما في الحقيقه لا تفعلان شيء سوى الركلة في أول الاعلان (الشركتين المنافستين المفروض انهما تساعدان فى تقديم الخدمة لاكبر عدد ممكن لكن الشركة البطله هى التى تقوم بالواجب كلة طول الوقت )

إعلان في منتهى الذكاء والجاذبية .....

ملاحظات :

بالنظر لخطة أسعار الوهات المعلن عنها فى موقع الشركة الدقيقة بعشرين قرش فى أوقات غير الذروة فقط أما اوقات الذروة فهى أربعين قرش (اوقات الذروه هى الاوقات الى الناس بستعمل فيها المحمول بكثافة اكبر)

الشبكة الخضرا واقعة بقالها كام يوم .... هذا وفقا لصاحبتى الى جابت الزيرو حداشر و هو ما جعل منظري وحش امام البنت لأن انا الى مليت دماغها بجمال و روعة و سمبتيك الشبكة الجديده وازاى انهم فى الامارات كيت وكيت و الزيرو 50 بتاعهم يا محلاه

كل سنه وانت طيب

أول ايام عيد الاضحى اصحو كالعادة متأخره واركض لألحق باختى وامى هنا وهناك حتى نبداء فى التحرك لمنزل العائله حيث العيد كل سنه وانتوا طيبين :) اشترى كارت محمول وتشتري اختى كارت وفي الطريق نشحن الخط ونرسل رسائل التهنئه هنا وهناك في هذه الظروف انا سيد من يلبس طاقية ده لده رساله صاحبتى ابعتها للعيلة كلها بينما رسالة بنت عمى تروح لكل أصدقائى . مع مراعاة ان فلانه اخت علانه وبالتالى كل واحده رساله و هكذا .

عند جدتي رحبت بخالى القادم من السفر ولامنى خالى الأخر لانه لا يرانى كثيرا بينما اخبرنى خالا ثالثا ان صدام حسين قد اعدم صباح اليوم..... هه؟

طوال الوقت من يوم القيض عليه مرورا بالمحاكمة ولحكم الخ الخ كان الامر يبدو كمزحة فحتى لو حكم عليه الامريكان بالاعدام سيجدون طريقه لتاجيل الحكم والتسويف فربما يمكنهم استعماله فى وقت لاحق في امر ما .. لكنهم صباح اليوم اعدموه ..(بالسلامه) لكن لا استطيع الا ان اتوقف امام التوقيت الغريب.

هل قالوا فى عقل بالهم مثلا انهم كده هايزودوا فرحة الناس بالعيد ؟؟ الاخبار تقول ان العراقين فى امريكا واسترليا قايمين الافراح و رافعين الاعلام ومعلقين البلالين فى عربياتهم احتفالا بوفاته وباقى الدنيا( الدنيا بتاعتنا يعنى مصر وسوريا وتونس والسعوديه ) تستنكر وتستهجن وتستغرب من التوقيت اما فى دنيا الاخ العقيد فالحداد رسمى ثلاث ايام وهو ما يثير سؤال لو انها حقا تفكر في زيادة الفرحة بالعيد فاى ناس تقصد بهذه الفرحة العرب الى اغلبهم بحتفل بعيد الاضحى وبتقول لهم عساكم من عواده ولا الامريكان الى بيحتفلو بالسنه الجديده وبتقول لهم هابى نيو يير .

صباح العيد الناس كلها تخرج من الصلا لذبح الاضحية و امريكا لا ادري ما الذي خرجت منه بالضيط بس اهى خرجت تعدم صدام . يعنى بشكل ما امريكا حطت نفسها بقصد بقى لا من غير قصد فى مقارنه . المسلم من دول بيصلى العيد ويسمع الخطبة ويتوكل على الله ويروح يقف فى طابور الجزار الى هايدبح له الخروف . وامريكا بالصلا عالنبى لا سحر ولا شعوذة صدقت على الحكم وجابت الراجل وحطته فى القفص الحديد ولفت الحبل حوالين رقبته (ليست امريكا فى حاجه للوقوف فى الطابور فلديها موظفين مخصوص) .. وهى ميزه من حقك ان تحسدها وانت واقف لحد الظهر مستنى الجزار يخلص و بتحكى لابنك الى اول مره بيحضر دبح قصة سيدنا ابراهيم وسيدنا اسماعيل والشيطان الى حاول يغويهم عن امر ربنا والفدو العظيم الى بعته ربنا من السما .. الجزاربتاعك اخيرا وصل عندك و بيسمى على الدبيحة ويتوكل و يظبط صدام والحبل ومش عارفة بقى هايقرا عليه الحكم الى بموجبه سيتم الاعادم ولا لا و بعدين هوب الخروف بتاعك بيفرفر ويرفص الجلاد بقى يشد الرافعه و يفتح الباب الارضى او يزق الكرسى الى موقفينه عليه او ربما يدى الحصان الى مركبينه عليه شلوت يقوم الحصان يجري وصدام يتدلدل من فرع الشجرة يرفص شويه وبعدين يقطع النفس... هنا بقى الجزار بتاعك يدفس الخرطوم فى بق الخروف ويزقه كويس وبعدين يقعد ينفخ فيه لحد ما الخروف يبقى بالونه من اللحم والصوف يسهل الان سلخها وتقطيعها وتوزيعها في اكياس متساويه انت تاخد تلت وقرايبك ياخدوا تلت والغلابا و المساكين التلت ونوع تلت الغلابه بقى يعتمد انت راجل كويس وهتاخد الشغت والفشه والممبار والفروة لروحك عشان الناس التانيه تاخد لحمه اكثر ولا هاتحطهم في كيس الغلبان عشان انت بتتعب من اكلهم وطنط سنيه مش بتحب الحاجات البلدى دى و تروح تدى الفروه للعربيات الى بتلمها؟

السؤال بقى لو كانت امريكا بتبعت لنا بالحركة دى ماسدج عساكم من عواده يا حلوين .. تفتكرالسنه الجايه الخروف هايكون عند انهى حلو فينا؟ السؤال التانى (يطرح نفسه بسبب سعر كيلو اللحمة) يا ترى امريكا هاتهوبص فى انهى تلت من الخروف و وتوزع عليك بالعدل والقسطاس انهى تلت؟ وهل انت اصلا من بقية قرايبها او نسايبها او تنتمى اصلا للغلابة عشان تحط عينك الى مايملاهاش غير التراب على حتة من الخروف؟