أنا من البلد دي

في أول ليالي حظر التجول سهرت حتى الصباح اتابع التغطيه الاخباريه العالمية كانت السي إن إن على حافه الجنون أو هذا ما بدا لي فكل الاخبار عن مصر او تدخل فيها مصر بشكل او اخر في الاقتصاد البورصه تتراجع في امريكا واوربا بسبب مصر اسعار البترول ترتفع بسبب مصر , خلال اليالي التالية تكرر الامر مع تغطيه اوسع قناه السويس توصل التجارة من اسيا لاوربا في مصر هناك خط بترول يمر من البحر الاحمر للأسكندريه لنقل الوقود لاوربا و امريكا , افرض الخط اتعطل , افرض القناه وقفت , نرجع نلفف من راس الرجاء الصالح؟؟ تقارير و محللين وناس رايحة وناس جايه مراسلين ومذيعين وضيوف اشكال والوان  , البيت الابيض يتكلم , هلاري بتتكلم و في الاخر اوباما بيتكلم ,  الدنيا قايمه على طراطيف صوابعها خايفه على استقرار مصر عشان استقرار مصر يعنى استقرارهم هما كمان..
طيب أنا من البلد دي وعمري ماحسيت بالاهميه دي ليه ؟؟ لأن نظام كداب منافق فاسد حرامي  مستبد كان طابق على مراوحي و مفهمنى انى ولا حاجة ماليش قيمة ماليش دية ولانه خلانا مضحكة الدنيا وشرابه خرج بين الدول احساسي الشخصي بالعدمية انعكس على بلدي كان احساسي انها كمان معدومة من الوجود مالهاش قيمة مالهاش دية و مالهاش صاحب و لو ليها صاحب مش انا ولا الى زيي ..
لكن لا انا من البلد دي البلد الى لو عطست العالم كله يقف على رجل و لو صابتها الحمى العالم يتشل .. انا من البلد الى قامت على قلب رجل واحد بمطلب واحد ومش هاتتنازل لحد ما تحققه انا من البلد الى اجبرت امريكا تعترف على نفسها في اعلامها الموجه لمواطنيها احنا كنا حمير بديل لما صدقنا مبارك و سبناه يضحك علي دقننا  ويقول ان مصدر القلق الوحيد هو الاخوان والسلفيين و ان مع مبارك انت مطمن .. انا من البلد الى خلت الدنيا مش ملاحقة علينا مراسلين عايزين يفهموا كل ده كان فين جايبينه منين كنا مخبينه في انهى حته .. انا من البلد دي و مش هاسمح لاى حد لا مبارك ولا أجعص منه يسلبني الأحساس ده ابدا

0 التعليقات:

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..