كل حاجة سليمة بس لوحدها

لا بي ولا عليا ورايحة اعمل واجب الترجمة بتاعي ... في حالى خالص والله .. اقوم اتكعبل على الفيس بوك في التحفة الفنية الوذعية دي

 
عانقيني عانقيني ثم إيه
ثم تبقي ثم أبقى ثم حلوة عنيكي ليه
ثم قلبك ليه ماردش ثم أنا أصبح محدش
ثم أسهر ثم أفتش ثم أعمى يعمل ايه
ثم أقولك ساعديني ساعديني
...ثم هما كانوا هما ثم قالوا كلام كتير
ثم فاهم ثم أزعل ثم أنا أصلا كبير!
ثم أقولك ساعديني ساعديني
عانقيني عانقيني عانقيني ثم إيه
ثم تبقى ثم أبقى ثم حلوة عنيكي ليه؟
 
 حد فهم حاجة؟؟؟ هم مين راح فين و اتخانق مع هما و لا دوكهما ؟؟ زي عادل امام في شاهد ماشفش حاجة ..رب قوم راحو لقوم ف مالقهومش قامو واخدين بعضهم وراجعين تاني ... طب ده حتى دي جملة مقيدة 
عانقيني عانقيني ثم ايه ؟؟ انا كمان عايزة اعرف ثم ايه
ثم تبقى ثم ابقي ... تبقوا ايه ؟ مش فاهمة
ثم خد بالك من الدرة دي 
ثم هما كانوا هما ثم قالو كلام كتير .. نعم؟؟؟؟ هما مين الى هما وقالوا ايه بالظبط و لا هو سر ؟؟ تكونش العمليه في النملية وانا مش واخده بالى
ثم تاتي الدرة دي لتحتل مكانها 
ثم فاهم ثم ازعل ثم انا اصلا كبير ... طبعا يا خويا كبير حد كان قال غير كده كبير وفاهم كل حاجة ماشاء الله عليك
صاحبتي اما بقلها فين الترجمة الصيني ضحكت وقالتلي الاغنية عظيمة اسمعيها زي ما هي كده وما تفصصيهاش
انا متفقه معاها طبعا ان الاغنيه أي اغنية مش برتقانه عشان تتفصص بس برده ربنا عرفوه بالعقل .. ثم ايه نظرية ثم معاه هو ما فيش حرف عطف غيرها في العربي ... ثم منين عانقيني و بعدين قلبك ليه ماردش  يعنى هي كانت هاتبقى فصحي وبعدبن قلشت على عامي ؟؟  ولا يكونش بيحب واحدة بتتكلم عربي مكسر؟؟ ولامين الى كان ضارب موز باللبن ساعتها

انا بقى ردي عليها وعلى الاخ الهيمان الى بيغني هو و الجمهور الى عمال يصوت ويعيط هو نفس رد رمضان السكري في العيال كبرت لما بسأل سلطان
العربية سليمة يا سلطان
اه طبعا كل حاجة سليمة بس لوحدها
يعنى أيه يا ولد
كل شيء سليم بس مستقل بذاته العجل في ناحية و الكنب في ناحية و البيبان في ناحية
رد عليه رمضان : حسبي الله ونعم الوكيل فيكو كشفت راسي ودعيت عليكو بالعربي والانجليزي والفرنصاوي
و من عندي أنا بقى أضيف الى قايمة اللغات و بالصيني

0 التعليقات:

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..