خواطر تحليلية شريرة

من كام يوم كنت قاعدة في حالي خالص فاتحة الفيس بوك و هات يا لعب كنت فاتحة جنبة اذاعة عربي على النت. ما بين البرامج في أغاني وانا مش سميعة أوي فمش بركز مين بيغنى و بيقول ايه الا يعنى لو كلمة ما أخترقت وداني ووقفت كل الي بعملة عشان اعلى الصوت واركز واسمع طبعا ده نادر بس بيحصل
المهم ده حصل ساعتها و لقيت الجملة دي بتخرم وداني كلامك دخل من الناحية دي خارج هوا من الناحية التانيه طبعا انا تنحت وقلت ايه ثم اتفتحت في الضحك لما فهمت انها تقصد ان كلامة دخل من الودن دي خرج من الودن دي لكن خواطر شريرة بدات تلعب في دماغي طيب يا شابة مش توضحي... يعنى لما الناس بتقول الودن دي والودن دي بيبقى معروف اتجاه الكلام من الشمال لليمين او من اليمين للشمال خصوصا ان الجمله عادة ما يصاحبها اشاره قائلها لأذنيه .. لكن لما تقولي الناحية دي والناحية التانيه وانا قاعدة سمعاكي مش بتفرج على الفيديو يبقي لازم تحددي أنهي ناحية بالظبط لأن البني أدم له ست نواحي مش ناحيتين بس .. طبعا تحت تأثير من الخواطر الشريرة قمت عليت السماعة فلقيت المغنية بتعيد نفس الجملة واتضح اني ظلمتها وانها حددت فعلا اتجاة الكلام وانا الى سمعت غلط

كانت بتقول كلامك نازل من الناحية دي خارج هوا من الناحية التانية هنا تأكد لي انها لا تشير لاذنيها أطلاقا لأن المسار الي كلامه مشي فيه رأسي بينما المسار بين الأذنين أفقي ...
 و يبقى سؤال هل كان للكلام أثناء خروجه من الناحية التانيه صوت أو رائحة أم كلاهما؟؟
و عجبي

0 التعليقات:

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..