شخبطه

لا الشعر بتاعى ولا العامية منطقتي ولو حد من فتواتها خد باله منى وانا فايته من جنب الحيط نهاري مش فايت فخلينا كده فى السكروت المحندق عشان نعرف ناكل عيش ماشي ؟
عفريتك
ــــــــ
فِ الأول خوفِك كان سجانِك
خوفِك منهم خوفِك منِك
خوفِك من عفريت محبوس جواكِ
لكن اكتر خوف جنني
خوفِك منى

فجاءه لقيت عفريت قدامى
بيلعبلى حواجبه ويضحك
زَق شمال .. زَق يمين
" وسع أنت وهو ..ادخل جوه
وسع للجنيه
اوعى لعينها تلمح روحَك
اوعى لنارها تملى جروحَك
وسع منك له
وسع أنت كمان "

أنت كمان !!
امتى و فين ..ازاى ؟
لسه امبارح كنت بقول
كنت بقول .. والله مفاكر
اه .. خوفِك منى
خوفِك فين ؟ فجاءه اتبخر ؟
ولا إداري جنب الحيط
خايف منِك خايف منهم خايف م العفريت

اه م العفريت
اه منِك

4 التعليقات:

محمد هشام عبيه 16/5/05 4:18 م  

لما الشخبطة تطلع حلوة كده
يبقى تعيش الشخبطة
بس أوعي تخافي من العفريت..ده العفريت غلبان جواه نفس الخوف..مني ومنك..
بالمناسبة ..نصيحة ..لاتقرئي نيتشة

نعناعة 17/5/05 1:03 ص  

ماشي يا فندم تعيش الشخبطة و يعيش الساده الدقهلاويه كمان :)
"بس أوعي تخافي من العفريت..ده العفريت غلبان جواه نفس الخوف..مني ومنك"
ما تصدقوش ده بيتمسكن لحد ما يتمكن ..

"نصيحة ..لاتقرئي نيتشة "
وبعدين بقي ارسلكو على حل .. طيب ممكن على سبيل الفضول يعنى ؟

نعنع

moe 25/5/05 9:51 ص  

لا تمام.......
شخبطة اية بس؟؟؟
حلوة بجد

نعناعة 25/5/05 4:24 م  

شكرا يا فندم ربنا يخليك
بجد يعنى مارسى باكو :)

هاهنا ..

مساحة شخصية لا أكثر ولا أقل .. إن اعجبك ما فيها اهلا بك وإن لم يعجبك اتركها غير نادم لا تصدع راسك و رأسي رجاءاً ..